八月廿四日朝早，我同大西係九點鐘前已經到左廣源既足球場，因為係前一日，朱仔同黃虫約左我地去個度踢波。講起，大家都識左成個幾月，雖然係志趣相投，不過就未有一次真真正正咁係場上踢番次爽既，只係去camp個陣同陌生人玩左一陣而已。九點鐘過到去，都唔見佢地既蹤影；九點半又過左去，仍然唔見人，我同大西都顯得好唔耐煩，於是就走去細場度睇下佢地係唔係個度，點知細場連鬼影都冇隻，真係越來越躁。十點到喇，先見到佢地慢慢行過黎，個陣幾想打佢地呀，朱仔最離譜，九點先起身，個陣我地已經到左喇，哥仔。
廢話唔講，就同人地踢左上黎，睇黎我地個個都未熱夠身喇，個波到腳都唔知點去處理佢，下下失波。後黎先慢慢上左腳，朱仔更係個人表演，一個人係咁扭波，我地只係企係度，等佢幾時扭到累左交個波俾我地。快樂時間過得特別快，好快就到左十二點，係時候要去食晏，跟住就要搞今個暑期長征最後一個活動了。總結今場波，雖然我入左幾多球下，不過作為一個中場既我，入波唔係我既責任，分波先係我的職責，可惜今次我傳既波都未夠到位，搞到我地既前鋒大西都唔知點好，跑到佢死死下，佢好似冇入過波，都係我呢個中場冇能，對唔住呀，大西。而朱仔射左好多次遠程炮，只係唔中目標，佢話佢今日失準，可能係因為佢心中既個個「她」今日唔會出現掛；黃虫做後衛都幾好架，雖然都有失誤，不過失誤就個個人都會架喇，都係要讚下佢，希望下年既學界比賽，佢可以踢得更好啦( 希望我都係 )。
一點半，我同大西兩個提前黎到中心禮堂，出面橫風橫雨，呢度卻係鴉雀無聲，真係好大對比。大西突然話要出去買野，我獨自一個留係禮堂等佢，趁冇人係度，不如靜靜地訓下覺。一撻落個地下度，合埋雙眼，先知道原來我真係好累，不過呢幾日都冇時間俾我好好咁訓下。兩點過後，依然冇人進入禮堂，睇黎d 人又係遲到架喇，算啦，遲到又唔係咩野特別既事，我都經常係咁，況且今日既天氣又咁唔掂。轉眼間，長征人陸陸續續咁黎左，我地既工作又要開始喇，佈置既佈置，搬野既搬野，大家分工合作，所有野都完成晒了，就係得個音響唔多掂，搞左好耐都係咁樣，都唔知做乜鬼。D人都出晒去食野，淨番我、大西同阿達三個傻佬係度，我地既玩野時間又到喇，又扮IQ博士入面既超人，又扮食神入面既夢遺大師，真係好過癮。最後就係我地練下前手翻個D，點知個個都撻到條腰骨痛晒。
比賽就快開始，我地各就各位，我地既位置係最悶既，負責擰「咪」俾人，其後就係一直坐係度發呆，係冇聊架喇。QQ同阿衫係今日既司儀，佢地都話好緊張，點知一出場就講錯野，佢地都話自己好唔掂，其實初賽個陣，我同大西都有出錯，只不過我地兩個係唔上心既人，衰左都唔當一回事。跟住又輪到音響度出錯，算啦，都係個句，「從錯誤中學習」。有驚冇險，到左揭曉誰是冠軍既時候喇，係一個靚仔奪得呀，佢贏左就梗係要再唱多次架啦。係佢唱歌其間，我地成班義工就係佢後面又跳舞，又轉圈，跟住就係我同大西兩個打側手翻出去，個感覺真係好爽，只可惜阿達提前番左屋企，如果唔係，我相信我地會玩得更激更過癮。
比賽完左後，又係影相時間，我地男仔又係搞鬼既時候喇，人地影相，我地就係度破壞，擰個「小心地滑」既牌係度周圍搞，扮彈吉他、扮拉二胡‥‥‥最爽既一幕就係朱仔抱住我影相，真係難為左佢喇，佢想抱既人冇出現，而要抱我呢個幾百斤重既人，唉‥‥‥最後影左幾張集體相就走lu，今個暑假既長征活動亦就此告一段落。
出面仲落緊大雨，有一個傻佬提議大家去飲糖水，咁我地就順人意啦，我同大西都係以食野為主，肚餓呀，大家食完野就番歸。可能三號風球已經懸掛左，落左車行路都好難，連把遮都整到斷左，咁就唯有淋住雨行番去，都幾爽架，雖然俾雨打中都幾痛。
文章定位：
